Búgin Ministrler Keńesiniń májilisler zalında Qaraqalpaqstan Respublikası Joqarǵı Keńesiniń Baslıǵı Amanbay Orınbaev basshılıǵında keńeytilgen apparat májilisi ótkerildi.
Onda Qaraqalpaqstan Respublikası Joqarǵı Keńesi Baslıǵınıń Orınbasarı R.Saparbaev hám Qaraqalpaqstan Respublikası Ministrler Keńesiniń Baslıǵı F.Ermanov qatnastı.
Ótkerilgen májiliste qala hám rayon hákimlikleri, ministrlik hám basqarıw uyımları tárepinen belgilengen tapsırmalardıń orınlanıwı hám aldaǵı ámelge asırılıwı tiyis wazıypalar talqılandı.
Májilis kún tártibinde dáslep Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı qararına tiykar járdemge mútáj shańaraqlarǵa tiyisli úy-jaylardı shiferlap beriw, zárúrlerin qaytadan qurıw, sonday-aq, respublikamızdıń qubla rayonlarındaǵı topıraq jollardı qum-щeben aralaspalı jollarǵa aylandırıw boyınsha belgilengen wazıypalar sheńberinde ámelge asırılıp atırǵan jumıslar kórip shıǵıldı.
Sonıń menen birge, mámleketlik baǵdarlamalar sheńberinde alıp barılıwı tiyis qurılıs-ońlaw hám abadanlastırıw jumısları, olardıń búgingi kúndegi barısı boyınsha máseleler qarap shıǵıldı.
Májilis kún tártibi boyınsha bir qatar jónelisler, sonıń ishinde xalıqtıń jasaw jaǵdayın jaqsılaw, jańa jumıs orınların jaratıw, investiciyalıq hám isbilermenlik joybarlardıń iske túsiriliwi, bank jumısları, eksport prognozınıń orınlanıwı, qayta tikleniwshi energiya derekleri menen islesiw hám basqa da áhmiyetli baǵdarlar haqqında sóz etildi.
Bunnan tısqarı, májiliste barlıq basqarıw uyımları, mákeme-shólkemlerge belgilep berilgen wazıypalar, sonıń menen birge, Ózbekstan Respublikası Prezidenti tárepinen qabıl etilgen Párman hám qararlardaǵı tapsırmalardıń orınlanıwın támiyinlew zárúrligi atap ótildi.
Sonday-aq, belgilengen tapsırmalardı orınlawda jol qoyılǵan qáte-kemshilikler sınǵa alınıp, óz jumıslarına nemquraydılıq penen qaraǵan juwapkerler eskertildi.
Májilis juwmaǵında barlıq taraw basshılarına wazıypalar belgilep berildi hám hár bir jónelis boyınsha jumıslardıń orınlanıwı qadaǵalawda ekenligi atap ótildi.
Qaraqalpaqstan Respublikası Joqarǵı Keńesiniń Málimleme xızmeti